نعتِ سرور ہی سے جیون میں سماں رہتا ھے
✦
ورنہ افلاک کی تہ میں تو فغاں رہتا ھے
نالہ آتا ھے بہانے کو تو کہہ اٹھتا ہوں
✦
یانبی آپ کا عاصی بھی یہاں رہتا ھے
موجِ دوراں کا تسلسل بھی ھے مائل بہ کرم
✦
قافلہ عشق کا لیکن جو رواں رہتا ھے
دلِ مضطر سے دوامی کو شغف حاصل ھے
✦
غم کے در پَے ہی تو معنی کا جہاں رہتا ھے
ایک سایہ ھے تلے جس کے مکیں رہتے ہیں
✦
اُس کی گردش میں مگر کون و مکاں رہتا ھے
ایسے رہتا ھے مِرے در پہ ندامت کا نزول
✦
جیسے پیشانی پہ سجدوں کا نشاں رہتا ھے
سب کو ہونے کا ہی رہتا ھے نہ ہونے پہ گماں
✦
مجھ کو ہونے پہ بھی احساسِ زیاں رہتا ھے
یہ بھی منزل ھے کہ دیدہء المناک میں اب
✦
اشک رہتے نہیں منظر کا دھواں رہتا ھے
عقل جوبن کو بھی کر دیتی ھے لاغر اک دن
✦
عشق پیری میں بھی ہر طور جواں رہتا ھے
دل مدینے کی طلب میں جو مچلتا ھے شجاع
✦ مقطع ✦
پھر نہ پہلو میں یہ رہتا ھے وہاں رہتا ھے